अंजोर सिनेमा। छत्तीसगढ़ी सिनेमा ह अब दुनिया के कोनो आन सिनेमा ले कमतर नइये, हालांकि छोटे हवय, दर्शक कमती हवय, तभो ले सफलता के झंडा गाड़े म इहां के निर्माता/निर्देशक मन पाछु नइ घुचे। सिनेमा म फिलिम के लाइन अउ दर्शक मनके भीड़ ये बात के परमान हाबे के छत्तीसगढ़ी सिनेमा के भविष्य घातेच फरिहर हे। बात करे जाए दर्शक मनके पदंस के तो इहां के दर्शक कहानी अउ मनोरंजन ल बने मन करथे अउ येमा आनंद मानिपुरी एक दरी सफलता पा डारे हावय। ओमन जब 'सरई' फिलिम ल दर्शक मनके बीच लानिस तो लोगन मन बहुत पसंद करिस। अब आरो मिले हावय के आनंद मानिकपुरी एक शानदार फिलिम लेके आवत हाबे जेकर नाम हे 'ये ददा रे'।
सोशल मीडिया ले मिले आरो के मुताबिक 'ये ददा रे' 23 अगस्त के सिनेमाघर म आही। फिलिम के पोस्टर सोशल मीडिया म आगे हावय। फिलिम के लेखक अउ निर्देशक, सह निर्माता आनंद मानिकपुरी हावय, सबले खास बात ये कि येमा अब निर्माता मोहित साहू तको निवेश करे हावय। एन.माही फिल्म के बैनर तरी बने ये फिलिम म ये पइत बतौर नायिका हेमा शुक्ला नजर आही। जेन अभी एन.माही फिल्म के 'गुईंया' म शानदार अदाकारी करे रिहिस। बहरहाल अभी तो फस्ट लूक लांच होहे..., देखत राहा आगू का-का धमाका होवइया हे।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।