अंजोर.रायपुर,ए। छत्तीसगढ़ खाद्य, नागरिक आपूर्ति अउ उपभोक्ता संरक्षण विभाग के निर्देश के मुताबिक प्रदेस म प्रचलित राशनकार्ड के नवीनीकरण अउ राशनकार्डधारी मनके के ई-केवायसी करे जात हावय। प्रदेस के सबो श्रेणी के राशनकार्ड अन्त्योदय, प्राथमिकता, एकल निराश्रित, निशक्तजन अउ एपीएल योजना के राशनकार्डधारी मनके ई-केवायसी अउ राशनकारड मन के नवीनीकरण 30 जून 2024 तक अनिवार्य रूप ले कराये खातिर किहिन हावय। खाद्य विभाग ले मिले जानकारी के मुताबिक राशनकार्ड नवीनीकरण करे बर ई-केवायसी कराना अनिवार्य हावय। अभी के बेरा म प्रदेस म लगभग 77 लाख राशनकार्ड हितग्राही हावय। अब तक कुल 70 लाख राशन कार्डधारक के नवीनीकरण करे जा चुके हावय।
विभाग ले मिले जानकारी के मुताबिक राशनकार्ड नवीनीकरण के खातिर खाद्य विभाग के डहर ले खाद्य नागरिक आपूर्ति अउ उपभोेक्ता संरक्षण विभाग के नया मोबाईल एप्प तइयार करे गे हावय, एला प्ले स्टोर म जाके डाउनलोड करे जा सकत हाबे। हितग्राही डहर ले खाद्य विभाग के वेबसाइट http://khadya.cg.nic.in ले डाउनलोड करके नवीनीकरण के बुता कर सकत हाबे। हितग्राही उचित कीमत दुकान म तको जाके ऑनलाईन के माध्यम ले अपन नवीनीकरण अउ ई-केवायसी के बुता करवा सकत हावय।
ई-केवायसी के खातिर सबोच हितग्राही के बायोमेट्रिक अद्यतन होना चाही जेन सदस्य मन के बाल आधार बना हावय ओला पहिली आधार सेवा केंद्र ले अपन बायोमेट्रिक अपडेट कराना होही येकर बाद उचित कीमत दुकान के ई-पॉस मशीन ले ई-केवायसी करा सकत हावय। राशनकार्ड म ई-केवायसी अउ नवीनीकरण के सुविधा फोकट म होही।
छत्तीसगढ़ी अनुवाद- जयंत साहू
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।