किरंदुल म बाढ़, सर्वे करके दे जाही मुआवजा

अंजोर.रायपुर,ए। किंरदुल म बाढ़ ले क्षतिग्रस्त मकान के जल्‍दी मुआवजा दे जाही। राजस्व अमला डहर ले क्षतिग्रस्त मकान के सर्वे करे जात हावय। कलेक्टर दंतेवाड़ा ह राजस्व अमला ल मकान, पालतु पशु मन उक के नुकसान के संबंध म जल्‍दी सर्वे बुता पूरा करे के निर्देश दे हावय।

जिला प्रशासन दंतेवाड़ा डहर ले किरंदुल म जगह-जगह बरसात ले होए ले जल जमाव ल कोपर टेक्टर मशीन ले रोड के साफ सफाई के जात हावय। बाढ़ ले प्रभावित परिवार ल स्थानीय मंगल भवन म रुके अउ भोजन उक के तको बेवस्था करे हावय। प्रशासन के टीम डहर ले क्षतिग्रस्त मकान के सर्वे तको सुरू कर दे हावय। जेकर आधार म नुकसान के आकलन करके ओला क्षतिपूर्ति दे जाही। मौसम सामान्य होए म बाढ़ प्रभावित मन के आन समस्या के निराकरण करे जाही।

जानबा होवय के पाछु कुछ दिन ले दंतेवाड़ा जिला के किंरदुल म सरलग बरसात होए के सेती नदियां उफान म रिहिस जेकर सेती किंरदुल पहाड़ी म एनएमडीसी डहर ले बने डेम क्षतिग्रस्त हो गे रिहिस। क्षतिग्रस्त डेम ले मलबा तनि बोल्डर युक्त पानी के सैलाब ले डेम के आसपास के इलाका के लगभग 150 मकान क्षतिग्रस्त होगे येकर अलावा पालतु पशु मन अउ वाहन तको क्षतिग्रस्त हो गे रिहिस।