सांय-सांय जाही मितानिन मनके खाते म रकम : मुख्यमंत्री विष्णुदेव साय

अंजोर.रायपुर,ए। मुख्यमंत्री विष्णुदेव साय ह विकसित छत्तीसगढ़ के संकल्पना म काम करे के सुरू कर दे हावय अउ येकर सुरूआत स्वस्थ छत्तीसगढ़ के बात के संग करे हावय। मुख्यमंत्री साय ह राजधानी रायपुर के दीनदयाल उपाध्याय आडिटोरियम म राज्य भर ले आये हजारों मितानिन बहिनी के आगू किहिन के उंकर सरकार पूरा पारदर्शिता के संग काम करत हावय अउ वो राज्य म सुशासन के रसता म आगू बढ़त हावय। ओमन किहिन के उंकर ए सफर म राज्य भर म काम करत लगभग 72 हजार मितानिन बहिनी के तको अमूल्य योगदान हावय जेकर दम म राज्य मातृ मउत दर अउ शिशु मउत दर म अनोखा सुधार हासिल करे म कामयाब होइस हावय।

ए मउका म मुख्यमंत्री विष्णुदेव साय ह मितानिन बहिनी ल नवा सौगात देत ओला हर महीना उंकर प्रोत्साहन रकम ल सोज बैंक खाता म ट्रांसफर करे के सुरू करिस। मुख्यमंत्री ह रिमोट के बटन दबाके राज्य स्तर ले मितानिन प्रोत्साहन रकम के सोज बैंक खाता म अंतरण करिन। ए अंतरण ले राज्य भर के मितानिन  बहिनी के खाता म 90 करोड़ 8 लाख 84 हजार 20 रूपिया के अंतरण होइस। ए रकम म केंद्र अउ राज्य के अंश के संग ही मितानिन प्रोत्साहन रकम तको सामिल हावय। ये रकम 69 हजार 607 मितानिन बहनें, 3 हजार 448 मितानिन प्रशिक्षक, 289 ब्लॉक समन्वयक, 176 स्वास्थ्य पंचायत समन्वयक, 26 शहरी क्षेत्र समन्यवक अउ 285 मितानिन हेल्प डेस्क समन्वयक ल राज्य स्तर ले एक संग भुगतान करे गिस।

मुख्यमंत्री ह मितानिन मन ल संबोधित करत किहिन के पहिली ओला कई चरण म अटक अटक के रकम मिलत रिहिस, फेर अब अइसे नइ होही अउ हर महीना सांय सांय उंकर खाते म पइसा आही। ओमन किहिन के मितानिन मन छत्तीसगढ़ के स्वास्थ्य बेवस्था के आधार हावय जेन सुदूर क्षेत्र म जाके तको इमानदारी ले काम करत हावय।

कार्यक्रम के अध्यक्षता करत स्वास्थ्य मंत्री श्याम बिहारी जायसवाल ह मितानिन बहिनी के लगन अउ समर्पण के प्रति आभार व्यक्त करत किहिन के मितानिन राज्य के स्वास्थ्य बेवस्था के रीढ़ के हड्डी हावयं जेन मन ग्रामीण अंचल के आखरी छोर तक स्वास्थ्य के बागडोर संभाले रखे हावय। ओमन किहिन के पहिली तको मितानिन मन ल बैंक म रकम दे जात रिहिस, फेर ये रकम ब्लाक स्तर अनियमित अंतराल म आवे अउ ओमा केंद्र, राज्य अउ स्वयं के अंश के जानकारी नइ होवत रिहिस। नवा बेवस्था म मितानिन बहिनी ल हरेक महीना रकम उंकर बैंक खाता म मिलही जेमा उंकर केंद्र, राज्य अउ स्वयं के प्रोत्साहन रकम के जानकारी तको मितानिन पासबुक के माध्यम ले मिलही। जायसवाल ह किहिन के मितानिन बहिनी के मेहनत के सेती ही छत्तीसगढ़ म संस्थागत जचकी के दर सरलग बढ़त हावय अउ लोगन म जागरुकता फैलत हावय, ओमन किहिन के मितानिन बहिनी के सेती पूरा देश म स्वास्थ्य के क्षेत्र म छत्तीसगढ़ के नाम रोशन होवत हाबे।

ए मउका म मुख्यमंत्री विष्णुदेव साय ह राज्य के आने-आने हिस्सा ले आये मितानिन बहिनी ले बात तको करिस अउ ओला मितानिन पासबुक देके शाल अउ फल ले सम्मानित तको करिन। कार्यक्रम म उप मुख्यमंत्री अरूण साव, उप मुख्यमंत्री विजय शर्मा, वन मंत्री केदार कश्यप, विधायक अनुज शर्मा, विधायक गुरू खुशवंत साहेब, विधायक इंद्र कुमार साहू, स्वास्थ्य विभाग के अपर मुख्य सचिव मनोज कुमार पिंगुआ समेत स्वास्थ्य विभाग के वरिष्ठ अधिकारी अउ बड़का संख्या म मितानिन कार्यकर्ता उपस्थित रिहिस।

छत्‍तीसगढ़ी अनुवाद- जयंत साहू

सपांदक 'अंजोर' वेबपोर्टल