साय कैबिनेट अयोध्या धाम म करिस श्री रामलला के दरसन, मंदिर म गूंजिस नारा छत्तीसगढ़ के भांचा राम, जय राम, जय राम

श्री रामलला मंदिर अयोध्या दर्शन

अंजोर.रायपुर,ए। अयोध्या धाम म पबरित राम जनम भुइंया म रामलला के दरसन के खातिर जइसे ही मुख्यमंत्री विष्णु देव साय अउ उंकर कैबिनेट के साथी पहुंचिस। पूरा मंदिर परिसर म नारा गूंज उठिस। छत्तीसगढ़ के भांचा राम, जय राम, जय राम। ए रकम ले पूरा परिसर राम भक्ति  के माहौल में, ननिहाल ले आए भगत के वाणी ले गुंजायमान हो गे।

शिवरीनारायण ले बोइर अउ पबरित जल, विष्णु भोग के चावल, अनारसा, करी लड्डू अउ कोसा के  कपड़ा प्रभु ल अर्पित

जेन रकम ले महतारी शबरी के शिवरीनारायण म भगवान राम के पुण्य दरसन के इच्छा पूरा होए रिहिस। उही साध ननिहाल के हर राम भगत ल होवत हावय। उही रकम ले मुख्यमंत्री विष्णु देव साय अउ उंकर कैबिनेट के तको रामलला के दरसन के इच्छा आज पूरा होगे। मुख्यमंत्री विष्णु देव साय सहित उंकर कैबिनेट के सदस्य मन ह आज अयोध्या धाम पहुंच के श्रीरामलला के दरसन करिस। मुख्यमंत्री ह ए मउका म भाँचा राम के ननिहाल के उपहार तको प्रभु के चरण म अर्पित करिन। ओमन छत्तीसगढ़ ले शबरी महतारी के भूमि शिवरीनारायण ले बोइर अउ पबरित जल, विष्णु भोग के चावल, अनारसा, करी लड्डू अउ कोसा के कपड़ा प्रभु ल अर्पित करिस।

मुख्यमंत्री साय ह प्रभु राम ले छत्तीसगढ़ के  सुख समृद्धि के कामना करिस

मुख्यमंत्री साय ह ए मउका म प्रभु राम ले छत्तीसगढ़ के लोगन के सुख समृद्धि के कामना करिस। ए मउका म मुख्यमंत्री ह किहिन के हम लोगन पूरा कैबिनेट के संग रामलला के दरसन के खातिर आज अयोध्या धाम आए। भगवान श्रीराम हमर छत्तीसगढ़ के भांचा हावयं। भांचा राम के दरसन के खातिर हम लोगन बहुत उत्सुक रिहिस। भगवान श्रीराम के आशीर्वाद ले वो शुभ घड़ी आ गे हावय जब हम लोगन ल अयोध्या धाम म रामलला के दरसन के सौभाग्य मिलिस।

मुख्यमंत्री ह किहिन के जब हमन अयोध्या धाम जाये के फइसला लिस त सोचा के जब अपन भांचा के दरसन के खातिर जाही त उंकर खातिर ननिहाल के कोति ले का उपहार लेके जाएं। फेर विचार आइस के येकर ले अच्छा उपहार भगवान श्रीराम के खातिर का हो सकत हावय के हम वो पबरित भुइंया शिवरीनारायण ले बेर ले जाके भगवान ल भेंट करें, जिहां के बोइर खुद महतारी शबरी ह प्रभु श्रीराम ल अपन हाथ ले खिवाये रिहिस।

मुख्यमंत्री ह किहिन के उन जूठे बेर के सुरता हमेशा के खातिर लोक सुरता म दर्ज हो गे हावय। महतारी शबरी के ए धरती ले भगवान श्रीराम के खातिर ये उपहार ले जाये के हमन ल सौभाग्य मिले येकर ले बढ़के हमन ल का चाही।

मुख्यमंत्री ह किहिन के छत्तीसगढ़ जनजाति प्रदेस हावय। इहां महतारी शबरी अउ केऊ जनजाति विभूति ह भगवान श्रीराम के स्वागत करिन हावय। हमर ये धरती धन्य हावय। ये अद्भुत संयोग हावय के छत्तीसगढ़ भगवान श्रीराम के ननिहाल तको हावय अउ ये उंकर वन गमन पथ के हिस्सा तको हावय। रामकथा ले जुड़े विद्वान बतावत हावयं के श्रीराम ह अपन वनवास के चौदह साल म दस साल इहें गुजारे।

ओमन रामायण के प्रसंग ले तको अपन बात बताईस। मुख्यमंत्री ह किहिन के  रामायण के प्रसंग जनजाति लोगन ले श्रीराम के अद्भुत स्नेह अउ प्रभु श्रीराम के जनजाति लोगन ले अपार परेम के कहानी कहत हावयं। ओमन किहिन के मोर सौभाग्य हावय के प्रदेस के मुखिया के रूप म अयोध्या पहुंच करके छत्तीसगढ़ के लोगन के अपन आराध्य के प्रति अगाध स्नेह अउ भक्ति व्यक्त करे के माध्यम बना हवं।

रामलला के दरसन ले अभिभूत मुख्यमंत्री ह किहिन के श्रीराम ह हमन ल रामराज्य के आदर्श दे हावय। छत्तीसगढ़ म रामराज्य के आदर्श ल लेके हम चल रिहिन हावयं। श्रीरामलला के दरसन करके हमन प्रभु ले अपन प्रदेस के सुख-समृद्धि के कामना के  हावय। मुख्यमंत्री ह किहिन के अयोध्या धाम श्रीरामलला दरसन योजना के माध्यम ले हमर प्रदेस के बहुत ले दरस करइया श्रीरामलला के दरसन के पुण्य फायदा ले चुके हावयं। उन सबले श्रीरामलला के बड़का मंदिर अउ उंकर मंजुल मूरति के बड़ई सुनके मन बहुत मगन होवत  रिहिस। आज हमन ल तको रामलला के दरसन के सौभाग्य मिल गे।

ए मउका म मुख्यमंत्री के कैबिनेट के साथी उपमुख्यमंत्री अरुण साव, विजय शर्मा, कृषि मंत्री राम विचार नेताम, वन मंत्री केदार कश्यप, खाद्य मंत्री दयाल दास बघेल, स्वास्थ्य मंत्री श्याम बिहारी जायसवाल, वित्त मंत्री ओपी चौधरी, श्रम मंत्री लखन लाल देवांगन, महिला अउ बाल विकास मंत्री श्रीमती लक्ष्मी राजवाड़े, खेल मंत्री टंक राम वर्मा तको मौजूद रिहिन। येकर संग ही किरण देव, अजय जामवाल अउ पवन साय तको मौजूद रिहिन।

छत्‍तीसगढ़ अनुवाद- जयंत साहू

संपादक 'अंजोर' वेब पोर्टल