अंजोर.ए। छत्तीसगढ़ के लोकप्रिय गायिका आरू साहू के नवा बस्तरिया हल्बी गाना 'जावां जावां रे' 24 जुलाई के Aaru Sahu यूट्यूब चैनल म आही। वइसे तो आरू साहू सबो रकम के पारंपरिक गीत म अपन आवाज दे हावय। खास करके सुवागीत, गौरा गउरी, फाग गीत, जसगीत, पंथी गीत ओमन के खास पसंद करे जाथे। येकर अलावा उँकर कर्मा, ददरिया के गायकी के खास शैली हावय। अब आरू साहू नवा किसम के गीत लेके आवत हावय, जेमा आप मनला बस्तरिया हल्बी सुने बर मिलही। मिले आरो के मुताबिक 'जावां जावां रे' गीत ल लिखे हावय ओम प्रकाश पांडेय, येमा संगीत दे हावय ओपी देवांगन। निर्देशक अउ डांस मास्टर हावय संजू तांडी, निर्माता आवय शीत बसंत साहू, कृष्णा साहू।
आरू साहू के नवा बस्तरिया हल्बी गाना 'जावां जावां रे' के एक अऊ खास बात हावय के येमा हमर परोसी राज्य मध्यप्रदेश के जिला डिंडोरी के रहइया आदिवासी नोनी अर्चना सिंह मार्को डेब्यू करत हावय। जानबा होवय के मध्यप्रदेश के कई ठी जिला म छत्तीसगढ़ी बोले जाथे जेमा डिंडोरा, बालाघाट, अनूपपुर उक हावय। Archna Singh Marko सोशल मीडिया म कोनो नवा नाम नोहय। ओमन सरलग अपन व्लॉग वीडियो शेयर करत रिथे। अर्चना सिंह मार्को के फेसबूक म लाखों फॉलोवर हावय। खैर गाना तो शानदार लगबे करत हे, संग म वीडियो के बारे म अर्चना सिंह मार्को जेन जानकारी साझा करे हे अपन व्लॉग के माध्यम ले वहू गजब नीक लागथे।
ARCHNA MARKO VLOGS: अर्चना सिंह मार्को के वइसे तो हमन बहुत अकन आनी-बानी के वीडियो देखते रिथन। ये ओमन के पहिली वीडियो एल्बम आए जेमा आरू साहू के गीत के संग छॉलीवुड म डेब्यू करही। अर्चना ह गजब सुघ्घर छत्तीसगढ़ी सवांगा म दिखत हावय। बताये गे हावय के उँकर शूटिंग बागबाहरा के चंडी मंदिर के आस-पास के वनांचल क्षेत्र म होए हाबे। तो देखे बर झन भुलाहू आरू साहू के गाना म अर्चना सिंह मार्को के शानदार अदाकारी।
(फोटो-अर्चना सिंह मार्को फेसबूक से साभार)
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।