अंजोर। एन माही फिल्म प्रोडक्शन के बैनर तरी बने छत्तीसगढ़ी फिलिम 'हंडा' प्रदेश के 69 सिनेमाघर म रिलीज होगे। छॉलीवुड के बड़का निर्माता मोहित साहू के टीम कोति ले 5 जुलाई ले अगाहुच टिकट बुकिंग करे, अउ भीड़ ले बांचे के गेलौली करे गे रिहिस। लोगन मन पहिली ले टिकट ले डारे रिहिस। हंडा के टीम ह रायपुर के श्याम टाकीज म फिलिम देखिन अउ दर्शक मनला जोहार करिस। पहिली ही दिन दर्शक मनके खचाखच भीड़ सिनेमा के भरपूर आनंद लिस। लोगन मन फिलिम के गजब बड़ई तको करिन हावय। बताये जात हावय के अधिकांश सिनेमाघर म पहिलीच् दिन हाउसफुल शो रिहिस।
फिलिम म अहम किरदार म अमलेश नागेश, अमृता कुशवाहा, अनिल सिन्हा, जीत्तू दुलरवा,पप्पू चंद्राकर, विनायक अग्रवाल, नीरज उईके, धमेंन्द्र साहू, अमित गोस्वामी, लतीश भांगे, रूद्रा राजपूत, मोहित जोशी, हेमलाल कौशल अउ राजेश पांड्या उक मन हावय। सिनेमा म वइसे तो ये कलाकार मन पहिली ले रमे हावय लेकिन ए खास मउका रिहिस के ओमन युवा मनके आइकॉन सुपर स्टार अमलेश नागेश के निर्देशन मन पहिल पइत काम करिस। बहुत झन कलाकार मनला ये फिलिम म पहिली पइत बड़का भूमिका म देखे गीस। लोगन मन सबो के काम ल बहुत पसंद करे हावय।
गीत-संगीत के जिम्मा ओमी स्टाइलियो के खांद म रिहिस। ओमी के बुता के बड़ई तो लोगन मन गाना रिलीज के बखत ले ही करत हावय। जब ले गोरी ओ गोरी गाना रिलीज होइस, रिकॉर्ड उपर रिकॉर्ड बनावत हावय। ओमी के शानदार गीत-संगीत के संग सुनील सोनी अउ अनुपमा मिश्रा के मधुर आवाज ह जन मानस म गर्दा उड़ा दे हावय।
- फिल्म- हंडा
- निर्माता- मोहित कुमार साहू
- निर्देशक- अमलेश नागेश
- स्टार कास्ट- अमलेश नागेश, अमृता कुशवाहा, अनिल सिन्हा, पप्पू चंद्राकर, जीत्तू साहू, विनायक अग्रवाल, रूद्रा राजपूत, नीरज उईके आदि।
- डीओपी- रजत सिंह राजपूत
- एडिटर- गौरांग त्रिवेदी उमेश ध्रुव
- म्यूजिक- ओमी स्टाइलियो
- वितरक- तरुण सोनी मां फिल्म्स
हंडा फिल्म के बारे में—
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।