छत्तीसगढ़ म शिक्षक अउ पढ़ईया मनके संख्या के अनुपात राष्ट्रीय अनुपात ले बेहतर : साय

अंजोर.रायपुर,ए। मुख्यमंत्री विष्णु देव साय ह विधानसभा म प्रश्नकाल म स्कूल शिक्षा के संबंध म जानकारी देवत बताइन के छत्तीसगढ़ म शिक्षक अउ पढ़ईया मन के अनुपात राष्ट्रीय अनुपात ले बढि़या हावय। ओमन बताइन के देश म 26 पढ़ईया मनके पाछु एक शिक्षक हावयं जबकि प्रदेस म 21 पढ़ईया मनके पाछु एक शिक्षक हावय। शिक्षक मन के पदस्थापना म अब तक कुछ अव्यवस्था रिहिस। जेकर सेती शिक्षक मन के कमी परिलक्षित होवत रिहिस। ये कारन ले सबले पहिली युक्तियुक्तकरण करना पहिली प्राथमिकता होही। 

जानबा होवय के छत्तीसगढ़ म शिक्षक अउ पढ़ईया मन के अनुपात राष्ट्रीय औसत ले तको बढि़या हावय। युक्तियुक्तकरण के प्रक्रिया पूरा होए ले सबो स्कूल म शिक्षक मिल सकही। साय सरकार डहर ले करे जात युक्तियुक्तकरण के सकारात्मक असर प्रदेस के शिक्षा बेवस्था म पड़ही अउ अइसे स्कूल म तको शिक्षक मिल जाही जिहां शिक्षक के कमी के सेती ले शिक्षा प्रभावित होत हावय।