अंजोर.ए। छत्तीसगढ़ के गाथा गायन के सबले जुन्ना परंपरा पंडवानी के कपालिक शैली के बड़का कलाकार तरुणा साहू ल कांस्टीट्यूशन क्लब ऑफ़ इंडिया दिल्ली म आईकॉनिक पीस अवॉर्ड काउंसिल डहर ले पंडवानी (फोक एंड ट्रेडीशनल आर्ट ऑफ़ छत्तीसगढ़) खातिर आईकॉनिक हॉनरेरी अवार्ड ले सम्मानित करे गे हावय। ये बात के आरो तरूणा साहू ह अपन सोशल मीडिया ठिहा म शेयर करके दे हावय। ओमन ए मउका के फोटो अउ वीडियो तको साझा करे हावय।
जानबा होवय के पंडवानी गायिका तरूणा साहू ह रेल सुरक्षा बल राजनांदगांव म इंस्पेक्टर हावय। ओमन नानपन ले ही बहुत प्रतिभाशाली हावय, पढ़ई के अलावा संगीत म तको उंकर रूचि रिहिस। उंकर स्कूली शिक्षा जवाहर नवोदन विद्यालय माना कैंप रायपुर म होए हावय। इहें उंकर भेट पंडवानी के पर्याय कहे जाने वाली पंडवानी के कपानिक शैली के पुरोधा पद्म विभूषण डॉक्टर तीजन बाई ले होइन, फेर तहान ओमन पंडवानी म रमगे। तरूणा साहू जी मन घलोक पद्म विभूषण डॉक्टर तीजन बाई के मयारू शिष्या मन म एक हावय।
रेल सुरक्षा बल म इंस्पेक्टर के नौकरी करत ओमन लोक कला के सेवा म तको रमें हावय। प्रदेश के सबो बड़ा मंच म प्रस्तुति देके संग ओमन अयोध्या महोत्सव म शानदार पंडवानी के प्रस्तुति दे हावय। कतको राष्ट्रीय पुरस्कार उनला लोक कला के क्षेत्र म मिलगे हावय। पाछू दिन ओमन ल आईबीसी 24 न्यूज चैनल कोति ले आयोजित एक कार्यक्रम म बॉलीवुड फिल्म अभिनेत्री शिल्पा शेट्टी डहर ले शक्ति सम्मान 2024 ले सम्मानित करे गे रिहिस। प्रदेश के कई सामाजिक संस्था उनला पुलिस अउ लोककला के सेवा खातिर सम्मानित करे हावय। श्रीमती तरुणा साहू ह वर्तमान म छत्तीसगढ़ प्रदेश साहू संघ के सांस्कृतिक प्रकोष्ठ के सहसंयोजिका हावय।
पदम् विभूषण डॉ तीजन बाई के शिष्या
देश-विदेश म पंडवानी कला के साेेर बगरइया पद्म विभूषण डॉ तीजन बाई ह अपन आप म एक लोककला के यूनिवर्सिटी आए, ओकर बारे कतको लिखे-पढ़े जाए कमतिच होही। तीजन बाई जी ल भारत सरकार के सबो प्रतिष्ठित पुरस्कार मिल चुके हावय। येकर अलावा ओमन विदेश ले तको कतको सम्मान पाये हावय। तीजन बाई के शिष्या मनके गोठ करे जाए तो न सिरिफ छत्तीसगढ़ बल्कि देश-विदेश म कतकोन उंकर परंपरा ल आगू बड़ाये बर लगे हावय। जेमा एक प्रमुख नाम तरूणा साहू जी के तको आथे। ओमन मात्र 9 साल के उमर ले पंडवानी के शिक्षा ग्रहण करे हावय, कतकोन मंच म तीजन बाई संग कार्यक्रम साझा करेे हावय। आजकल तीजन बाई जी बीमार हावय। तरूणा साहू जी अपन पंडवानी गुरू तीजन बाई के सरलग सोर-खबर लेवत रिथे।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।