अंजोर.रायपुर,ए। छत्तीसगढ़ के मुख्यमंत्री विष्णुदेव साय ह नवा दिल्ली के कृषि भवन म कृषि अउ ग्रामीण विकास मंत्री शिवराज सिंह चौहान ले मुलाकात करिस। ए बखत छत्तीसगढ़ के कृषि अउ ग्रामीण विकास के आने-आने मुद्दा म विस्तार ले गोठबात होइस, जेमा नक्सल प्रभावित क्षेत्र म प्रधानमंत्री आवास योजना, मनरेगा अउ प्रधानमंत्री गांव सड़क योजना जइसे योजना मन के कार्यान्वयन म बिसेस जोर दे गिस।
मुख्यमंत्री विष्णुदेव साय ह छत्तीसगढ़ म प्रधानमंत्री आवास योजना ले वंचित 15.18 लाख पात्र परिवार के घर के मुद्दा तको रखिस, जेन म केंद्रीय मंत्री ह जलदी मंजूरी दे के आश्वासन दे हावय। केंद्रीय मंत्री ले मुलाकात के बखत उप मुख्यमंत्री विजय शर्मा तको संग रिहिस।
बइठक म मुख्यमंत्री साय ह केंद्रीय मंत्री ल सूचित करिन के छत्तीसगढ़ प्रधानमंत्री आवास योजना के तहत लंबित 15.18 लाख परिवार ल अभी तक घर के मंजूरी नइ मिले हावय। एमे 6.99 लाख परिवार योजना के स्थायी प्रतीक्षा सूची म हावयं अउ 8.19 लाख परिवार घर प्लस म सामिल हावयं। पहिली म योजना के खातिर राज्य के हिस्सा नइ मिले के सेती ये समस्या बने रही। मुख्यमंत्री ह जलदी घर मंजूर करे के अरजी करिन, जेन म केंद्रीय मंत्री ह ए म तुरते कार्रवाई कराये के बात कहीन हावय।
नक्सल प्रभावित क्षेत्र-
मुख्यमंत्री साय ह नक्सल प्रभावित क्षेत्र म आत्मसमर्पण करइया नक्सली मन अउ प्रभावित परिवार के पुनर्वास के जरूरत जताईस। ओमन किहिन नक्सल प्रभावित क्षेत्र होए के सेती सामाजिक आर्थिक जातिगत जनगणना-2011 अउ आवास प्लस 2018 के सूची म केऊ पात्र परिवार के नाम सामिल नइ हो सका हावय। ओमन 10,500 नवा पात्र परिवार ल प्रधानमंत्री आवास योजना म सामिल करे के अरजी करिन अउ संग ही नक्सल प्रभावित क्षेत्र म पंचायत मन ल घर बनाये के मंजूरी दे के मांग करिस।
मुख्यमंत्री साय ह छत्तीसगढ़ म कोदो, कुटकी, अउ रागी जइसे मिलेट फसल मन के उत्पादन ल बढ़ाये म जोर दे। ओमन किहिन के ये फसल मन के उत्पादन क्षमता बढ़ाना राज्य के खातिर जरूरी हावय काबर के ये पौष्टिक होवत हावयं अउ आदिवासी क्षेत्र म प्रमुख खाद्य जिनिस हावयं। संग ही, उन्नत तकनीक अउ बीजहा के उपलब्धता ले किसान मन के आय बाढ़ही। केंद्रीय मंत्री शिवराज सिंह चौहान ह छत्तीसगढ़ म कृषि अउ ग्रामीण विकास के आने-आने प्रस्ताव म जल्दी ले जलदी सकारात्मक पहल करे के आश्वासन दे हावय।
बइठक म छत्तीसगढ़ ले मुख्यमंत्री के सचिव पी दयानंद, पंचायत अउ ग्रामीण विकास विभाग के प्रमुख सचिव श्रीमती निहारिका बारिक, प्रधानमंत्री घर योजना के संचालक रजत बंसल अउ केंद्र सरकार के वरिष्ठ अधिकारी तको मौजूद रिहिन।
छत्तीसगढ़ी अनुवादक- जयंत साहू
संपादक 'अंजोर' छत्तीसगढ़ी वेबपोर्टल
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।