पढ़ाई के गुणवत्ता म बिसेस धियान दें: मुख्यमंत्री विष्णु देव साय

अंजोर.रायपुर,ए। मुख्यमंत्री विष्णु देव साय ह स्कूल शिक्षा विभाग के समीक्षा बइठक म किहिन के शिक्षा उन्नति के मूल मंत्र हावय। लइका ल गुणवत्तापूर्ण शिक्षा दे जाए। ये सुनिश्चित करें के स्कूल म अनुशासन बनय। विकासखण्ड शिक्षा अधिकारी मैदानी स्तर म जाके स्कूल म अध्ययन-अध्यापन के गुणवत्ता के मॉनिटरिंग करें। कलेक्टर तको हर महीना दू ले तीन स्कूल के दौरा करके उहां निरीक्षण करें।

मुख्यमंत्री ह किहिन के सुशासन अउ पारदर्शी प्रशासन हमर लक्ष्य हावय। राज्य सरकार के ये प्रयास होही के लइका ल स्कूल के बढि़या भवन मिले अउ उहां पढ़ाई-लिखाई के अच्छा बेवस्था सुनिश्चित हो। मुख्यमंत्री ह स्कूल के जीर्णोद्धार बुता के धीमी गति म कड़ी नाराजगी जतात किहिन के जर्जर स्कूल के जीर्णोद्धार के काम म ढिलाई बर्दाश्त नइ करे जाही। कलेक्टर स्कूल भवन के सुदृढ़ता के स्वंय मानिटरिंग करें। मुख्यमंत्री ह किहिन के जर्जर स्कूल के जीर्णोद्धार के खातिर सुरू करे गे स्कूल जतन योजना के तहत जीर्णोद्धार बुता के जांच करे जाए अउ स्कूल जतन योजना म आबंटित रकम के उपयोग करके बुता ल पूरा करिन जाए। समीक्षा के बखत मुख्यमंत्री ह शिक्षक मन अउ स्कूल के युक्ति-युक्तकरण के खातिर प्रस्ताव अगले कैबिनेट के बइठक मं प्रस्तुत करे के निर्देश दिस। ओमन किहिन के येकर ले स्कूल म शिक्षक मन के कमी दूरिहा करे म मदद मिलही। बइठक म मुख्यमंत्री के सचिव राहुल भगत अउ डॉ. बसवराजू एस., स्कूल शिक्षा सचिव सिद्धार्थ कोमल सिंह परदेशी तको उपस्थित रिहिस।

एक पेड़ मां के नाम

मुख्यमंत्री ह किहिन के प्रधानमंत्री मोदी ह मन के बात कार्यक्रम म ‘एक पेड़ मां के नाम’ लगाये के आव्हान करिन हावय। बरसात के मौसम म अइसे स्कूल जिहां चार दीवारी हो, उहां लइका ले पेड़ लगवाए जाएं। लइका ही पेड़ के देखभाल करें। नीम, गुलमोहर, करंज उक प्रजाति के पेड़ लगाए जाएं।

प्रदेशव्यापी मेगा-पीटीएम

मुख्यमंत्री साय ह किहिन के शिक्षक मन ल रोटेशन के आधार म प्रशिक्षण दे के खातिर प्रशिक्षण नीति तइयार करे जाए, ताकि सबो शिक्षक मन ल प्रशिक्षण मिल सके। मुख्यमंत्री ह किहिन के स्कूल ले लइका के पालक ल तको जोड़े जाए। छत्तीसगढ़ के सरकारी स्कूल म ए साल पहिली बार 6 अगस्त ल प्रदेशव्यापी मेगा-पीटीएम आयोजित करे जात हावय।

आरटीई के तहत ड्राप आउट रोके मेंटॉर होही नियुक्त

छत्तीसगढ़ म आरटीई के तहत गैर अनुदान मिले अशासकीय स्कूल मन म प्रवेश ले वाला पढ़ईया मन के ड्राप आउट म अंकुश लगाये के खातिर जिलेवार  अधिकारी मनला मेंटॉर के रूप म नियुक्त करे जाही। ए संबंध म स्कूल शिक्षा सचिव ह सबो कलेक्टर मन ल पाती लिखे हावय। मेंटॉर के रूप म नियुक्त अधिकारी आरटीई के तहत चयनित पढ़ईया मन के प्रवेश सुनिश्चित करही। लइका ल यदि कोनो समस्या आथे त उंकर पालक, स्कूल प्रबंधन अउ प्रशासन ले मिलके ओकर समाधान करही अउ पढ़ाई जारी रखे के खातिर लइका अउ उंकर पालक ल प्रोत्साहित करही।   

व्यावसायिक शिक्षा: लइका के स्किलिंग उद्योग के जरूरत के मुताबिक हो

मुख्यमंत्री ह स्कूल म व्यावसायिक पाठ्यक्रम ल बढि़या गुणवत्ता के संग संचालित करे के निर्देश दिस। ओमन किहिन के प्रदेस के उद्योग के जरूरत के मुताबिक लइका के स्किलिंग ए पाठ्यक्रम के माध्यम ले हो, ताकि बारहवीं पास करे के बाद ओला अभी के बेरा अउ नवा लगे वाला उद्योग म आसानी ले रोजगार के मउका मिल सके। लइका ल येकर फिल्ड ट्रेनिंग तको दे जाए। जानबा होवय के राष्ट्रीय शिक्षा नीति-2020 के तहत कक्षा 6 ले व्यावसायिक पाठ्यक्रम सुरू करे  जाही।

बालवाड़ी सुरू करे जाना हावय

बइठक म जानकारी दीस के छत्तीसगढ़ म छात्र-शिक्षक अनुपात राष्ट्रीय स्तर ले बढि़या हावय। राष्ट्रीय स्तर म 26 लइका म एक शिक्षक हावय, जबकि छत्तीसगढ़ म छात्र-शिक्षक अनुपात 21.84 हावय। बालवाड़ी के संबंध म जानकारी दीस के 5 ले 6 उमर वर्ग के लइका के खातिर प्रदेस म 9,438 बालवाड़ियां संचालित हावय। ए साल 1132 बालवाड़ी सुरू करे जाना हावय। पीएम योजना के समीक्षा के बखत जानकारी दीस गे के पहिली चरण म प्रदेस म ये योजना 211 स्कूल म सुरू करे गे हावय। ए योजना के तहत सबोच विकासखण्ड अउ नगरीय निकाय ले एक-एक स्कूल के चयन करके ओला मॉडल स्कूल के रूप म विकसित करे जात हावय। ए योजना म 198 स्कूल म ए योजना ल सुरू करे के खातिर प्रस्ताव भेजे गे हावय। स्कूल म बढि़या अधोसंरचना के संग किचन-गार्डन, एआई रोबोटिक्स, आईसीटी लैब के सुविधा के संग ग्रीन स्कूल के रूप म विकसित करे जाही। बइठक म बताइन के ए बार अधिकांश स्कूल म समर कैम्प के आयोजन करे गिस, जेमा लइका अउ शिक्षक मन ह उत्साह ले भाग लिस।

विद्या समीक्षा केन्द्र के संबंध म बइठक म बताइन के स्कूल शिक्षा विभाग डहर ले संचालित हितग्राहीमूलक योजना मन के मॉनिटरिंग बर विद्या समीक्षा केन्द्र बनाये गे हावय। चरणबद्ध रूप ले पढ़ईया मन अउ शिक्षक मन के उपस्थिति के ऑनलाईन मॉनिटरिंग, पढ़ईया मन के मूल्यांकन, मध्यान्ह भोजन योजना, शिक्षक मन के पदोन्नति-स्थानांतरण, छुट्टी उक के मॉनिटरिंग करे जाही। डाटा विश्लेषण बर सॉफ्टवेयर तइयार करे के खातिर आईआईटी भिलाई के संग एमओयू करे गे हावय। बइठक म प्रबंध संचालक समग्र शिक्षा संजीव झा, संचालक लोक शिक्षण श्रीमती दिव्या उमेश मिश्रा, संचालक एससीईआरटी राजेन्द्र कटारा, पाठ्यपुस्तक निगम के संचालक कुलदीप शर्मा तको उपस्थित रिहिस।

छत्‍तीसगढ़ी अनुवाद- जयंत साहू

संपादक 'अंजोर' वेब पोर्टल