दिल्ली म ट्राइबल यूथ हॉस्टल अउ छत्तीसगढ़ निवास के निरीक्षण करिस उप मुख्यमंत्री अरुण साव

छत्‍तीसगढ़ी समाचार अनुवादक जयंत साहू

छत्तीसगढ़ के उप मुख्यमंत्री अरुण साव ह नवा दिल्ली के दवारिका म राज्य के ट्राइबल यूथ हॉस्टल के दौरा करके सुविधा के निरीक्षण करिन। ओमन ए बखत हॉस्टल म रहत पढ़इया लइका ले मुलाकात करिस अउ उंकर पढ़ाई-लिखाई के बारे म जानकारी लिस। ओमन हॉस्टल म मिलत सुविधा के बारे म तको पूछिस। ए हॉस्टल म रिहिके छत्तीसगढ़ के अनुसूचित जनजाति, अनुसूचित जाति अउ आन पिछड़ा वर्ग के पढ़ईया आने-आने प्रतियोगी परीक्षा के तइयारी करत हावय। साव के संग राज्य शासन म लोक निर्माण विभाग के सचिव डॉ. कमलप्रीत सिंह तको ए बखत मौजूद रिहिस।

उप मुख्यमंत्री साव ह हॉस्टल म निवासरत पढ़इया लइका ले किहिन के तंहू मन सबो हमर राज्य के भविष्य हावयं। सरकार तंहू मन लोगन के शिक्षा अउ विकास के खातिर पूरा रकम ले प्रतिबद्ध हावय। ओमन पढ़इया लइका ल प्रेरित करत किहिन के वो अपन लक्ष्य के प्रति समर्पित रहय अउ राज्य के विकास म योगदान दें। राज्य शासन उंकर खातिर इहां सबो जरूरी संसाधन मौजूद कराये खातिर प्रयासरत हावय।

श्री साव ह किहिन के छत्तीसगढ़ सरकार आदिवासी, अनुसूचित जाति अउ पिछड़े वर्ग के पढ़इया लइका के शिक्षा अउ उंकर भविष्य के प्रति गंभीर हावय अउ ए दिशा म सरलग कदम उठात हावय। उप मुख्यमंत्री ले गोठबात के बखत पढ़इया लइका ह अपन समस्या अउ चुनौती तको साझा करिस। साव ह उंकर समस्या ल दूरिहा करे तुरते कार्रवाई करे के आश्वासन दीस।

उप मुख्यमंत्री साव ह ट्राइबल यूथ हॉस्टल के निरीक्षण के बाद दवारिका म ही छत्तीसगढ़ निवास के तको दौरा करिन। ओमन उहाँ के बेवस्था के जायजा लेके सुनिश्चित करिन के छत्तीसगढ़ ले दिल्ली आने वाला नागरिक अउ अधिकारी मनके खातिर वाजिब सुविधाएँ मौजूद हों। ओमन छत्तीसगढ़ निवास के अधिकारी मन अउ कर्मचारी मन ल राज्य के लोगन के सेवा म सदैव तत्पर रेहे के खातिर निर्देशित करिन। साव ह ट्राइबल यूथ हॉस्टल अउ छत्तीसगढ़ निवास म अधिकारी मनला राज्य के पढ़इया लइका अउ नागरिक के खातिर मौजूद सुविधा ल बढि़या बनाये के संग ही उंकर समस्या के समाधान के तको निर्देश दिस।