मां कर्मा प्रोडक्शन हाउस के बैनर तरि बने छत्तीसगढ़ी पिक्चर 'तही मोर आशिकी' 6 सिंतबर 2024 ले प्रदेश के सिनेमाघर म रिलीज होही। तही मोर आशिकी के निर्देशन करे हाबे छत्तीसगढ़ के जाने माने डायरेक्टर अभिषेक सिंह ह अउ निर्माता हे गुलशन बघेल अउ शुभम गुप्ता। सोशल मीडिया म तही मोर आशिकी के गाना अउ ट्रेलर पहिली ही रिलीज हो चुके हावय। दर्शक मन प्रेम रंग म रंगे गीत ल खूब मया दुलार देवत हाबे। फिल्म म मुख्य किरदार म हाबे लक्षित झांझी अउ एल्सा घोष संग म रजनीश झांजी, उपासना वैष्णव, जीत शर्मा, मनीषा वर्मा, विवेक चंद्रा, संदीप त्रिपाठी, सरला सेन, नरेश, पप्पू चंद्राकर अउ आंचल के अहम भूमिका हाबे।
तही मोर आशिकी के कहानी के बात करे जाए तो येला लिखे हावय गुलशन बघेल अउ शुभम गुप्ता मन। ट्रेलर ल देखे म पूरा फिलिम लव स्टोरी लगथे। लड़की संग मया अउ बिहाव, अउ ओकर के पारिवारिक कहानी ल बहुत ही शानदार तरीका ले निर्देशक अभिषेक सिंह ह दिखाये के कोशिश करे हाबे। पिता के किरदार म रजनीश झांझी जो की अभिनेता लक्षित झांझी के वास्तविक पिता हे, रिल म तको शानदार अदाकारी करत दिखत हाबे। वइसे भी रजनीश झांझी छत्तीसगढ़ी सिनेमा म एक बड़का नाम हे, ओकर केउ ठी फिलिम म अपन अदाकारी के छाप छोड़े हाबे। अब पारी लक्षित झांझी के हावय, ओमन एल्सा घोष जइसे सफल अभिनेत्री के संग स्क्रीन शेयर करत हाबे। जानबा होवय के एल्सा घोष छत्तीसगढ़ी सिनेमा के सफल अभिनेत्री आए। छत्तीसगढ़ी के अलावा साउथ म तको एल्सा के काम ल पसंद करे जाथे।
सोशल मीडिया म फिल्म के आधिकारिक रूप ले 6 सितंबर 2024 के प्रदर्शन के आरो मिले हावय। शीर्षक गीत अउ ट्रेलर के धमला ले फिल्म के भव्यता साफ दिखत हाबे। रहे कसर ल उपासना वैष्णव, जीत शर्मा, मनीषा वर्मा, विवेक चंद्रा, संदीप त्रिपाठी, सरला सेन, नरेश अउ पप्पू चंद्राकर के अदाकारी निकाली। वइसे भी ये मउका ह छत्तीसगढ़ी तिहार के सिजन आए, अउ दर्शक मनला जोरदार रोमांटिक फिल्म देखे बर मिलने वाले हाबे येकर ले सुघ्घर मउका अउ का होही, तो देखे बर झन भुलाहू 'तही मोर आशिकी'।
- Movie : Tahi Mor Aashiki - तहि मोर आशिकी
- Cast : Elsa Ghosh, Lakshit jhanji, Rajnish Jhanji, Upasana Vaishnav, Jeet Sharma, Manisha Verma, Vivek Chandra, Sandeep Tripathi, Sarla sen, Naresh, Pappu Chandrakar, Aanchal etc..
- Lyrics : Chandra Prakash Bhardwaj, Shaswat Kumar
- Music : Sunil Soni
- Director : Abhishek Singh
- Producer : Gulshan Baghel, Shubham Gupta
- Producer Banner : Karmaa Film Production House
- Choreographer : Jeetu Rajpal
- DOP : Kunal kadam
- Editor : Gaurang Trivedi
- Graphics : Chilly Films
- Music on : SRK MUSIC
एल्सा घोष छत्तीसगढ़ी सिनेमा म अपन शानदार अदाकारी ले एक बड़का नाम बनाये हावय। आधा दर्जन छत्तीसगढ़ी फिलिम म ओमन सफलता पाये हावय। हाल ही सतीश जैन के निर्देशन म एल्सा के दू फिलिम रिलीज होइस दूनो सफल रिहिस। अब अमलेश के साथ एक अउ फिक्चर अवइया हाबे। अभी ओमन के लक्षित झांझी के रंग तही मोर आशिकी रिलीज होवत हाबे। अब तो अइसे कयास लगाये जावथे के ओमन आन प्रदेश के सिनेमा के बजाए छॉलीवुड म रम जही, अउ जम जही।
छॉलीवुड म लक्षित झांझी के परिचय भले जादा लम्बा नइये लेकिन सिनेमा अउ साहित्य के संस्कार ओमन अपन परिवार ले पाये हावय। लक्षित झांझी के पिता रजनीश झांझी छत्तीसगढ़ी अउ भोजपुरी सिनेमा के सफल अभिनेता हावय। अब लक्षित तको छत्तीसगढ़ी सिनेमा म बतौर नायक कुछ साल ले काम करत हाबे, अभी दू फिलिम कतार म हावय। लक्षित वइसे तो एक्शन अउ रोमांटिक स्टोरी के लिए जाने जाथे। अभी 6 सितंबर के रिलीज होवइया तही मोर आशिकी म ओमन एल्सा घोष के संग नजर आही।
 |
| छत्तीसगढ़ी फिल्म तही मोर आशिकी के पोस्टर। जेमा रजनीश झांजी, उपासना वैष्णव, जीत शर्मा, मनीषा वर्मा, विवेक चंद्रा, संदीप त्रिपाठी, सरला सेन, नरेश अउ पप्पू चंद्राकर मन काम करे हाबे। |
 |
| छत्तीसगढ़ी फिल्म तही मोर आशिकी के पोस्टर। ये फिलिम म जीत शर्मा, मनीषा वर्मा अउ संदीप त्रिपाठी के तको बड़े भूमिका हाबे। |
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।