छत्तीसगढ़ ओलंपिक संघ में कोन-कोन पदाधिकारी हे देखव

छत्तीसगढ़ ओलंपिक संघ के चुनाव राजधानी रायपुर के न्यू सर्किट हाउस म आयोजित छत्तीसगढ़ ओलंपिक संघ के बिसेस आमसभा के बइठक म करे गिस। जेमा मुख्यमंत्री विष्णु देव साय ह निर्विरोध छत्तीसगढ़ ओलंपिक संघ के अध्यक्ष चुने गिस। इही रकम ले मंत्री केदार कश्यप, सांसद बृजमोहन अग्रवाल अउ विजय बघेल सहित कुल 10 लोगन छत्तीसगढ़ ओलंपिक संघ के उपाध्यक्ष के रूप म निर्विरोध निर्वाचित होइस। रिटर्निंग ऑफिसर अशोक कुमार अग्रवाल ह मुख्यमंत्री ल अध्यक्ष चुने जाये के परमान पाती सउपिस।

मुख्यमंत्री विष्णु देव साय ह छत्तीसगढ़ ओलंपिक संघ के सबो नव निर्वाचित पदाधिकारी मन ल बधाई देत किहिन के छत्तीसगढ़ म खेल ल आगू ले जाये के खातिर हम सबो पूरा टीम भावना के संग काम करही। ओमन किहिन के छत्तीसगढ़ म खेल प्रतिभा के कमी नइ हावय। हमर सरकार  राज्य म खेल ल बढ़ावा दे के संग ही अधोसंरचना  विकास अउ खिलाड़ी मन के हित म सरलग फैसला ले हावय। 

साय ह किहिन के हमर लक्ष्य होना चाही के प्रदेस के खिलाड़ी ओलंपिक म खेले अउ मेडल जीत के लाएं। मुख्यमंत्री ह आगू किहिन के संघ के सबो पदाधिकारी मन ल एक-एक जिला के जिम्मेदारी दे जाए अउ वो अंचल म जेन खेल लोकप्रिय हावयं, ओला बढ़ावा दे के दिशा म काम होही। साय ह आगू किहिन के नवनिर्वाचित सबो पदाधिकारी कोनो ह कोनो रूप म खेल अउ येकर प्रशासनिक बेवस्था ले जुड़े हावयं, अइसे म  तंहू मन सबो के दीर्घ अनुभव के फायदा प्रदेस के खिलाड़ी मन ल मिलही।

सांसद अउ छत्तीसगढ़ ओलंपिक संघ के नव निर्वाचित उपाध्यक्ष बृजमोहन अग्रवाल ह किहिन के प्रदेस म प्रतिभावान खिलाड़ी मन के कमी नइ हावय, हमन ल ओला बढि़या अधोसंरचना, सुविधा अउ प्रशिक्षण मौजूद के जरूरत  हावय। ओमन किहिन के मुख्यमंत्री विष्णु देव साय के अगुवई वाला सरकार खेल ल बढ़ावा दे के खातिर सरलग काम करत हावय। अग्रवाल ह किहिन के मुख्यमंत्री ह बड़का पहल करत राजधानी रायपुर म स्काउट गाइड के राष्ट्रीय जंबूरी 2025 के आयोजन के सहमति जताईस। अग्रवाल ह किहिन के खिलाड़ी हमर एंबेसडर होवत हावयं, जेन प्रदेस ल राष्ट्रीय अउ अंतरराष्ट्रीय स्तर म पहचान देवात हावयं। ओला आगू बढ़ाये के खातिर छत्तीसगढ़ ओलंपिक संघ तको अपन प्रयास करें। ए मउका म ऑब्जर्वर दिग्विजय सिंह तको मौजूद रिहिन।

जानबा हावय के छतीसगढ़ ओलम्पिक संघ के बिसेस आमसभा म आज मुख्यमंत्री विष्णु देव साय ल निर्विरोध अध्यक्ष चुनेे गिस। इही क्रम म उपाध्यक्ष बर सबो बृजमोहन अग्रवाल, केदार कश्यप, विजय बघेल, हिमांशु द्विवेदी, संजय पिल्ले, गजराज पगारिया, शरद शुक्ला, रमेश कुमार श्रीवास्तव अउ सुनिल कुमार अग्रवाल अउ महासचिव के पद म विक्रम सिंह सिसोदिया निर्वाचित होइस। इही रकम ले समिलहा सचिव सर्वश्री राम जाखड़, आर. राजेन्द्रन, मोहम्मद अकरम खान, मनीष श्रीवास्तव, प्रशांत सिंह रघुवंशी, मनोज कुमार अग्रवाल अउ समीर खान ल निर्विरोध चुनेे गिस। संजय मिश्रा संघ के कोषाध्यक्ष चुने गिस। येकर संग ही ओलंपिक संघ के कार्यकारिणी सदस्य के रुप म 12 लोगन ल तको र्निविरोध चुनेे गिस।