मुंबईया कलाकार मनके चक्रधर समारोह रायगढ़ म रिकॉर्डिंग डांस, कलाप्रेमी मन म भारी रोष

रायगढ़ के प्रतिष्ठित संगीतमय कार्यक्रम 'चक्रधर समारोह' म हरेक साल बड़े बड़े कलाकार मनके कार्यक्रम होथे। चक्रधर समारोह के कार्यक्रम के अपन एक ऐतिहासिक गरिमा हावय। आन बच्छर सहिक एसो घलोक 39वां चक्रधर समारोह 7 से 16 सितंबर तक आयोजित करे गे हावय। ये बीच स्थानीय कलाकार मनके अलावा देश के कई बड़े बड़े कलाकार मनके प्रस्तुति देखे बर मिलत हाबे। इही म एक बात म कलाकार अउ कला प्रेमी मनके मन म भारी रोष हावय के अतेक बड़े कार्यक्रम म मुंबईया कलाकार मन रिकॉर्डिंग गाना म प्रस्तुति देवत हाबे। कोनो पेन ड्राइव, त कोनो लेपटॉप म गाना चलागे कार्यक्रम करत हाबे। कलाकार अपन जघा म बने हो सकत हाबे, लेकिन मंच के तको अपने गरिमा होथे। कम से कम चक्रधर समारोह म अपन परंपरा नइ होना चाहि। कलाकार अउ कला प्रेमी मन सोशल मीडिया म अपन बात मुखर होके राखत हाबे कि कतको बड़े कलाकार होवय चक्रधर समारोह म लाइव कार्यक्रम होना चाहिए काबर के रायगढ़ के संगीत घराना देश विदेश म मशहुर हे, उहां रिकॉर्डिंग संगीत के प्रस्तुति कहीं न कहीं समारोह के गरिमा ल कम करथे।

चक्रधर समारोह म शास्त्रीय संगीत के जादा कार्यक्रम होए के सेती स्थानीय कलाकार मन जादा मउका नइ मिलिस। जबकि ये बीच बॉलीवुड के कई कलाकार मनके प्रस्तुति देख बर मिलत हाबे। पारंपरिक लोक संगीत होवय चाहे शास्त्रीय, सुर, लय अउ ताल सबो म होथे। ये मुताबिक स्थानीय कलाकार मनला तको प्राथमिकता ले प्रस्तुति के जादा अवसर मिलना रिहिस।