राष्ट्रीय वन शहीद दिवस म बहादुर वनकर्मी अउ पर्यावरण संरक्षक के बलिदान ल नमन

छत्‍तीसगढ़ी समाचार अनुवादक जयंत साहू

राष्ट्रीय वन शहीद दिवस के मउका म बहादुर वनकर्मी अउ पर्यावरण संरक्षक मनके बलिदान ल मुख्‍यमंत्री ह नमन करिन हावय। वन शहीद के प्रति अपन श्रद्धा सुमन अर्पित करत साय ह किहिन हावय के राष्ट्रीय वन शहीद दिवस हर साल 11 सितंबर ल जंगल अउ वन्यजीव के सुरक्षा बर अपन जिनगी के बलिदान करइया बहादुर वनकर्मी अउ पर्यावरण संरक्षक मनके सुरता म मनाये जाथे।

ए दिन के मुख्य उद्देश्य लोगन ल पर्यावरण संरक्षण के प्रति जागरूक करे तको हावय। ओमन किहिन के राजस्थान के बिश्नोई समाज डहर ले पेड़ के कटाई के विरोध म अपन परान के आहुति अउ पर्यावरण संरक्षण के खातिर शहीद होइस लोगन के विरासत ल सम्मान दे के खातिर राष्ट्रीय वन शहीद दिन के शुरुआत करे गिस। साय ह किहिन के ये दिन उन वनकर्मी के साहस अउ बलिदान ल सम्मानित करे के हावय, जेन जंगल अउ वन्यजीव के रक्षा के खातिर अपन परान के परवाह करे बिना शहीद हो गे। ये दिन पर्यावरण संरक्षण के प्रति जिम्मेदार नागरिक बने के प्रेरणा देत हावय, जेकर ले आने वाला पीढ़ी के खातिर प्रकृति के धरोहर ल संरक्षित रखे जा सके।