मुख्य चुनाव पदाधिकारी श्रीमती रीना बाबासाहेब कंगाले ह आज प्रदेस के मान्यता मिले राजनीतिक दल के प्रतिनिधि मन के बइठक लिस। ओमन मुख्य चुनाव पदाधिकारी कार्यालय म आयोजित बइठक म रायपुर नगर (दक्षिण) विधानसभा उप-निर्वाचन के खातिर आदर्श आचार संहिता, चुनाव व्यय, मतदान के दिन के बेवस्था अउ भारत चुनाव आयोग के दिशा-निर्देश के जानकारी दीस।
जानबा होवय के भारत चुनाव आयोग डहर ले 15 अक्टूबर ल रायपुर नगर (दक्षिण) विधानसभा उप-निर्वाचन के कार्यक्रम के घोसना कर दीस हावय। रायपुर नगर (दक्षिण) उप-निर्वाचन के खातिर 13 नवम्बर ल मतदान अउ 23 नवम्बर ल मत के गिनती होही।
मुख्य चुनाव पदाधिकारी श्रीमती रीना बाबासाहेब कंगाले ह राजनीतिक दल के प्रतिनिधि मन ल बताइन के चुनाव कार्यक्रम के घोसना के संग ही रायपुर नगर दक्षिण विधानसभा क्षेत्र म आदर्श आचारसंहिता प्रभावशील हो गे हावय। ओमन बताइन के मतदान के खातिर रायपुर नगर दक्षिण विधानसभा क्षेत्र म 253 मतदान केंद्र हावयं जेन सबो शहरी क्षेत्र म हावयं। ओमन किहिन के 1500 ले जादा मतदाता संख्या वाला 13 मतदान केन्द्र म सहायक मतदान केंद्र बनाए जाही।
मुख्य चुनाव पदाधिकारी श्रीमती रीना कंगाले ह जानकारी दीस के आयोग के निर्देश के मुताबिक मतदान केन्द्र म मतदाता भारत चुनाव आयोग डहर ले जारी फोटोयुक्त मतदाता पहचान पाती के संग ही आयोग डहर ले अधिसूचित 12 आन रकम ले के पहचान पाती देखाके मतदान कर सकत हावयं।
मुख्य चुनाव पदाधिकारी श्रीमती कंगाले ह बइठक म राजनीतिक दल के प्रतिनिधि मन ल जानकारी दीस के नामनिर्देशन के खातिर आवेदन करइया के मात्र 3 वाहन ही नामांकन केंद्र के 100 मीटर के परिधि म प्रवेश कर सकही। नामनिर्देशन के खातिर आवेदन करइया सहित कुल 5 मनखे ही नामांकन कक्ष म प्रवेश कर सकही। श्रीमती कंगाले ह बताइन के आदर्श आचारण संहिता के उल्लंघन के शिकायत सी-विजिल एप के माध्यम ले करे जा सकत हावय। भारत चुनाव आयोग के सुविधा मोबाइल एप के माध्यम ले उम्मीदवार अउ राजनीतिक दल आने-आने रकम ले के अनुमति के खातिर आवेदन दे सकत हावयं।
बइठक म राजनीतिक दल अउ आवेदन करइया डहर ले चुनाव के बखत व्यय करे जाये के सीमा अउ व्यय लेखा के संधारण के संबंध म आयोग के निर्देश के जानकारी राजनीतिक दल के प्रतिनिधि मन ल दीस। बइठक म बताइन के चुनाव के बखत आवेदन करइया डहर ले करे जाये वाला चुनाव व्यय के सीमा 40 लाख रूपिया होही। बइठक म चुनाव बखत के बखत गाड़ी अउ रैली के मंजूरी के प्रक्रिया अउ ए संबंध म भारत चुनाव आयोग के दिशा-निर्देश ले तको राजनीतिक दल के प्रतिनिधि मन ल आरो कराइन।
बइठक म समिलहा मुख्य चुनाव पदाधिकारी पी.एस. ध्रुव, उप मुख्य चुनाव पदाधिकारी विनय अग्रवाल अउ अपूर्व प्रियेश टोप्पो अउ सहायक मुख्य चुनाव पदाधिकारी रूपेश वर्मा अउ श्रीमती शारदा अग्रवाल सहित आने-आने राजनैतिक दल के प्रतिनिधिगण मौजूद रिहिस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।