प्रदेस म कानून अउ बेवस्था के स्थिति के समीक्षा करिस मुख्यमंत्री विष्णु देव साय, पुलिस ल तुरते कार्यवाही करे के निर्देश

मुख्यमंत्री विष्णु देव साय ह मुख्यमंत्री निवास म आयोजित बइठक म प्रदेस म कानून अउ बेवस्था के स्थिति के समीक्षा करिस। मुख्यमंत्री साय ह बइठक म अधिकारी मनला निर्देशित करत किहिन के अपराधी मन अउ असामाजिक तत्व म सख्ती ले कार्यवाही करे जाए। ओमन किहिन के हर हाल म कानून अउ बेवस्था बहाल रखना चाहि। पुलिस तुरते कार्यवाही करे अउ चौकन्ना रेहे। बइठक म उपमुख्यमंत्री अउ गृहमंत्री विजय शर्मा तको मौजूद रिहिस।

मुख्यमंत्री ह किहिन के स्थानीय स्तर म होए वाला घटना मन म पुलिस के पैनी नजर होना चाही अउ ये घटना मन के संभावित परिणाम म तको विचार करे जाना चाही। ओमन किहिन के अपराध ल रोके के खातिर नसा के अवैध व्यापार म अंकुश लगाये जाए। गांजा, अवैध शराब, ड्रग्स के तस्करी म मुस्तैदी ले कार्यवाही हो।

श्री साय ह किहिन के नगरीय अउ ग्रामीण क्षेत्र म रतिहा म पुलिस के गश्त सरलग रूप ले होना चाही। पुलिस के आला अफसर तको अनिवार्य रूप ले पेट्रोलिंग करें। रेल्वे स्टेशन, बस स्टैण्ड, हवाई अड्डों के संग ही संवेदनशील इलाका म सरलग रूप ले पुलिस के पेट्रोलिंग होवत रहना चाही। नगरीय अउ ग्रामीण क्षेत्र म शॉपिंग मॉल, दुकान, होटल उक रतिहा के समय म करार समय म बंद होना चाही। बियर बार अउ होटल करार समय म बंद हो अइसे होटल जिहां दारू के अवैध बिक्री के शिकायत मिलत हावय उन म सख्त कार्यवाही करे जाए। मुख्यमंत्री ह किहिन के सायबर क्राईम ल रोके के खातिर तत्परता ले प्रभावी कार्यवाही करे जाए।

ए मउका म मुख्य सचिव अमिताभ जैन,अपर मुख्य सचिव गृह मनोज कुमार पिंगुआ, पुलिस महानिदेशक अशोक जुनेजा, मुख्यमंत्री के सचिव राहुल भगत सहित गृह विभाग के वरिष्ठ अधिकारी मौजूद रिहिस।