महिला अउ बाल विकास मंत्री लक्ष्मी राजवाड़े ह लटोरी म नवा तहसील कार्यालय के करिन शुभारंभ

छत्‍तीसगढ़ी समाचार अनुवादक जयंत साहू

महिला अउ बाल विकास अउ समाज कल्याण मंत्री श्रीमती लक्ष्मी राजवाड़े ह सूरजपुर जिला के लटोरी म नवा तहसील कार्यालय के सुरू करिन। येकर संग ही क्षेत्र के निवासी मन ल आज एक बड़े सौगात नवा तहसील कार्यालय के रूप म मिले हावय, जेकर ले लोगन के समय अउ पइसा दुनों के बचत होही। क्षेत्र के गांव पंचायत के लोगन राजस्व संबंधी मामला के निपटारा आसानी ले मिले सकही।

ए मउका म महिला अउ बाल विकास मंत्री श्रीमती लक्ष्मी राजवाड़े ह क्षेत्रवासी मन ल शुभकामना दीस। ओमन किहिन के लटोरी म तहसील कार्यालय खुल जाये ले आम नागरिक ल अब राजस्व संबंधी कामकाज के खातिर दूरिहा नइ जाना पड़ही। ओमन किहिन के नवा तहसील कार्यालय के खुले ले क्षेत्र के नागरिक ल येकर भरपूर फायदा मिलही। येकर ले राजस्व संबंधी मामला के निपटारा म गति आही। संग ही सरकारी योजना मन के सुचारू रूप ले क्रियान्वयन अउ प्रशासकीय कामकाज म कसावट लाने म सुविधा होही। शासन के योजना मन अउ मूलभूत सुविधा आम नागरिक ल आसानी ले मौजूद होही अउ विकास के रफ्तार तको बाढ़ही।

जानबा होवय के सूरजपुर जिला के नवा तहसील कार्यालय के बनाये लटोरी के नवापारा म 71.12 लाख के लागत ले करे गे हावय। तहसील कार्यालय के बनाये ले तीर-तखार के 64 गांव के लोगन ल तको येकर फायदा मिलही। ए मउका म जनप्रतिनिधि, संबंधित अधिकारी-कर्मचारी अउ गणमान्य नागरिक मौजूद रिहिस।