सोशल मीडिया म जिला अउ पुलिस प्रशासन के नजर, आंए-बॉए करहू त जाहू जेल

शांति बेवस्था बनाए रखे के खातिर बलौदाबाजार जिला म सोशल मीडिया म जिला अउ पुलिस प्रशासन पैनी नजर रखे हावय। जिला स्तरीय सोशल मीडिया निगरानी समिति के रिपोर्ट के आधार म सरलग संदिग्ध आईडी के पहचान बर गूगल, इंस्टाग्राम,फेसबुक, व्हाट्सप कंपनी ले सायबर सेल डहर ले संपर्क करे जात हावय। जेकर तहत 88 यूआरएल मेटा ल भेजे गे रिहिस। जेमा ले 19 इंस्ट्राग्राम ल पेज ल बंद करे के कार्रवाई करे गे हावय। संग ही 3 इंस्टाग्राम पेज ले वीडियो ल डिलीट करे गे हावय। येकर संग ही अनुविभाग गिरौद डहर ले 5 अपराधी मन के पहचान करके एक के खिलाफ धारा 107,116 (3) के तहत कार्रवाई करे गे हावय। येकर संग ही चार ह माफीनामा कबूल करत उंकर घर वाला ल ये प्रकरण म तको समझाईश दीस हावय। येकर अलावा सायबर पुलिस अउ थाना प्रभारी के मदद ले सोशल मीडिया म असंवैधानिक अउ गैर कानूनी बुता करइया मनखे मन के पहचान करके कार्रवाई करे जात हावय।

कलेक्टर दीपक सोनी ह जिलावासी ले अपील करत मनखे ल सोशल मीडिया म भड़काऊ कंटेन्ट पोस्ट करे ले बांचे किहिन हावय। यदि कोनो तको मनखे के पोस्ट भड़काऊ या सामजिक सौहार्द बिगाड़ने वाला होही त निश्चित ही सख्त कार्रवाई करे जाही।  जानबा होवय के कानून अउ बेवस्था के संदर्भ म सोशल मीडिया के प्रभाव ल धियान म रखत होइस सोशल मीडिया म जिला के सम्बन्ध म चल रिहिन गतिविधी म निगरानी रखे अउ नकारात्मक गतिविधी सम्बन्धी लेख म तुरते कार्यवाही करे बर जिला स्तरीय सोशल मीडिया निगरानी समिति के गठन करे गे हावय। जेकर माध्यम ले सोशल मीडिया म नकारात्मक लेख,तथ्य म 24 घंटा निगरानी रखे जात हावय।अवैधानिक, असंवैधानिक, गैर कानूनी अउ आपत्तिजनक पोस्ट, कमेंट्स उक पाये जाये म समिति रोज जानकारी संबंधित अनुविभागीय दण्डाधिकारी अउ संबंधित अनुविभागीय अधिकारी पुलिस ल तुरते कार्रवाई बर प्रेषित करे जात हावय।