छत्तीसगढ़ी़ समाचार अनुवादक जयंत साहू
मुख्यमंत्री विष्णु देव साय के उपस्थिति म आज मंत्रालय महानदी भवन म छत्तीसगढ़ के तकनीकी शिक्षा विभाग अउ i-Hub गुजरात (इनोवेशन हब गुजरात) के बीच एक जरूरी समझौता (MoU) म दस्तखत करे गिस। ए मउका म मुख्यमंत्री विष्णु देव साय ह नवाचार अउ उद्यमिता ल प्रोत्साहित करे के दिशा म ए साझेदारी ल एक ऐतिहासिक कदम बताइन।
मुख्यमंत्री साय ह i-Hub गुजरात के सफल मॉडल के बढ़ई करत किहिन के ये समझौता राज्य म स्टार्ट-अप अउ नवाचार के दिशा म एक नवा युग के शुरुआत करही। i-Hub गुजरात ह हज़ारों युवा मन के विचार, नवाचार अउ स्टार्टअप ल व्यवसायिक जिनिस म बदले म जरूरी भूमिका निभाये हावय। मुख्यमंत्री ह छत्तीसगढ़ म तको इही रकम ले के सफलता दोहराये के प्रतिबद्धता व्यक्त करिस अउ किहिन के ये साझेदारी युवा मन ल नवाचार के क्षेत्र म आगू बढ़े के खातिर जरूरी संसाधन, मार्गदर्शन अउ मउका दे करही।
मुख्यमंत्री ह किहिन के ये समझौता न सिरिफ तकनीकी सुविधा म केंद्रित हावय, बल्कि युवा मन ल सलाहकार, निवेशक अउ उद्योग विशेषज्ञ के संग जोड़के ओला सशक्त बनाये के मंच देही। ए साझेदारी ले छत्तीसगढ़ नवाचार अउ स्टार्ट-अप के क्षेत्र म अघुवा बनही।
उप मुख्यमंत्री विजय शर्मा ह किहिन के जेन युवा उद्योग अउ व्यापार के संबंध म नया विचार लेके आही ओला आर्थिक संसाधन के संग काम करे अउ रेहे के जगह मौजूद होही, जेकर ले वो अपन विचार ल व्यावसायिक रूप ले रूपांतरित कर पाही। ये संस्था युवा मन के कंपनी के संग अनुबंध करे म सहयोग करही।
तकनीकी अउ रोजगार विभाग के सचिव डॉ. एस भारतीदासन ह किहिन के ए एमओयू के माध्यम ले, युवा मन म उद्यमिता के विकास करे के खातिर एक ईको सिस्टम विकसित करे के प्रयास करे जाही, येकर खातिर सरकारी इंजीनियरिंग कॉलेज म एक केंद्र सुरू करे जाही। ओमन ये तको बताइन के छत्तीसगढ़ के युवा मन के 800 ले जादा पेटेंट हावय छत्तीसगढ़ म 1724 सुरू होइस हावयं। समझौता 3 साल के खातिर होही।
एमओयू म छत्तीसगढ़ के तकनीकी शिक्षा अउ रोजगार सचिव डॉ. एस. भारतीदासन अउ गुजरात सरकार के तकनीकी शिक्षा आयुक्त बंछानिधि पाणि ह दस्तखत करिस।
ए मउका म उप मुख्यमंत्री अरूण साव, खाद्य मंत्री दयाल दास बघेल, वन अउ जलवायु बदलाव मंत्री केदार कश्यप, वाणिज्य अउ उद्योग मंत्री लखन लाल देवांगन, वित्त मंत्री ओ.पी. चौधरी, महिला अउ बाल विकास मंत्री श्रीमती लक्ष्मी राजवाड़े, खेल अउ युवा कल्याण मंत्री टंकराम वर्मा, मुख्यमंत्री के सचिव पी. दयानन्द, डॉ. बसव राजू एस, राहुल भगत i-Hub के सीईओ हिरनमय महंता, छत्तीसगढ़ के तकनीकी शिक्षा संचालक डॉ. प्रियंका शुक्ला तको मौजूद रिहिस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।