छत्तीसगढ़ी सिनेमा के मयारूक दर्शक मन खातिर ये महीना अक्टूबर म दू ठी छत्तीसगढ़ी पिक्चर देखेबर मिलइया हावय। एक हे 'बालीफूल: वेलकम टू बस्तर' अउ दूसर 'दस्तावेज'। दूनो ह अलग अलग रुआब म हावय, लेकिन कहानी के मरम अउ संदेश म पै उघारे जाए तव दूनों म लोक जागरण भेद परगट होथे।
सिनेमा ल समाज के दरपन केहे जाथे। तब सिनेमा के तको जिम्मेदारी होथे के ओ ह समाज ल सही दिशा देवय। ये ओढ़र म 'दस्तावेज' अउ 'बालीफूल: वेलकम टू बस्तर' अपन जिम्मेदारी निभावत दिखथे।
छत्तीसगढ़ी फिलिम 'बालीफूल: वेलकम टू बस्तर' -
'बालीफूल: वेलकम टू बस्तर' के बात करे जाए तो हरिओम फिल्म प्रोडक्शन के बैनर तरी बने ये फिलिम के निर्माता हावय अजय अग्रवाल अउ डॉ. पुनीत सोनकर येकर निर्देशन करे हाबे। अहम किेरदार म भुनेश साहू, अंजलि ठाकुर, गोविंद विश्वकर्मा, हेमा शुक्ला, रवि शर्मा, नीलेश देवांगन, विनोद नेताम, घनश्याम वर्मा उक मन हाबे।
फिलिम के कहानी अउ संवाद लिखे हावय नीलेश देवांगन। सोशल मीडिया म रिलीज ट्रेलर ले कहानी के आरो लेवन तव बस्तर के लोक जीवन ल देखाये के उदीम करे गे हावय। एक कोति सुंदर ग्राम्य जीवन के चित्रण त दूसर कोति नक्सलवाद के लहू। अउ ये सब के बीच प्रेमी जोड़ी अउ ओकर परिवार के मार्मिक कहानी दर्शक मनके मनोरंजन करत लोक जागरण के सुघ्घर संदेश देवत हाबे।
इहां देखव बालीफूल: वेलकम टू बस्तर के आधिकारिक ट्रेलर
छत्तीसगढ़ी फिलिम 'दस्तावेज' -
'दस्तावेज' छत्तीसगढ़ी सिनेमा म अपन कुछ मिजाज के फिलिम आए जेला गुडलक फिल्म के बैनर तरी बनाये गे हावय सौरभ बरड़िया अउ सन्नी सिन्हा येकर निर्देशन करे हाबे। अहम किरदार म अनिल सिन्हा, सुमन पटनायक, फगेश सिन्हा, शशांक विश्वकर्मा, आलोक मिश्रा, रवि साहू, गायत्री निषाद, संगीता निषाद, अर्जुन परमार, भूमि साहू उक मन हाबे।
फिल्म के कहानी लिखे हावय सन्नी सिन्हा। सोशल मीडिया म रिलीज ट्रेलर ले कहानी के आरो लेवन तव ये आज के बखत के समाज के किस्सा ल उजगार करथे। समाज म लूट अउ घूस के खेल हरेक स्तर म दियार रही सचरे हावय। ये तो कहानी एक पहलू आए अउ दूसर पहलू म न्यायपालिका अउ कार्यपालिका आथे, अउ जब ये दूनो काम नइ आवय त तीसरइया म नेतीगिरी के रसता दिखथे। बस इही झुला-झांझरी के खेल ह ये फिमिल म दर्शक मनला भरपूर मनोरंजन देवाही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।