कब ले शुरू होही धान खरीदी अउ कइसे मिलही टोकन ? पूरा जानकारी अंजोर म पढ़व

• 14 नवंबर 2024 ले 31 जनवरी 2025 तक किसान मन समर्थन मूल्‍य म बेचही

• 07 नवंबर ले टोकन आवेदन के बेवस्था सुरू कर दे गे हावय

• छोटे किसान मन 2 टोकन अउ बडे़ किसान मन ल 3 टोकन के पात्रता होही

• शिकायत अउ निवारण बर हेल्प लाइन नंबर 0771-2425463 जारी

राज्य म 14 नवंबर ले धान के खरीदी सुरू होही। धान खरीदी के खातिर सबो जरूरी प्रारंभिक तइयारी पूरा कर ले गे हावय। राज्य म 2739 उपार्जन केन्द्र म किसान मन ले समर्थन कीमत म धान बिसाये जाही। खरीफ सीजन के खातिर प्रदेस म पंजीकृत किसान मन के संख्या 27,01,109 हावय। ए साल 1,35,891 नवा  किसान पंजीकृत होइस हावयं, जेकर ले 1,36,263 हेक्टेयर नवा रक्बा के पंजीयन करे गे हावय। कुल 34,51,729 हेक्टेयर रक्बा म पंजीयन मुताबिक धान उपार्जन के अंताजन हावय। सबो उपार्जन केन्द्र म बायोमैट्रिक डिवाईस के माध्यम ले उपार्जन के बेवस्था करे गे हावय। छोटे, सीमांत अउ बडे़ किसान मनके डहर ले उपजाये गे धान ल करार समर्थन कीमत म खरीदे जाही। येकर खातिर 07 नवंबर ले ही टोकन आवेदन के बेवस्था सुरू दे गे हावय। खरीदी सीजन म लघु अउ सीमांत किसान मनल अधिकतम 2 टोकन अउ बडे़ किसान मनल 3 टोकन के पात्रता होही।

14 नवंबर 2024 ले 31 जनवरी 2025 के बखत किसान अपन धान खरीदी केन्द्र म लान के समर्थन कीमत म बेचे सकत हावय। खरीदी केन्द्र म तौल बर इलेक्ट्रानिक कांटा-बांट के बेवस्था करे गे हावय। खरीदी केन्द्र ले धान के उठाव मिलर अउ परिवहनकर्ता के माध्यम ले समयानुसार कराये के निर्देश दिये गे हावय। सबो खरीदी केन्द्र म पर्याप्त बारदाना के बेवस्था ले लेके छांव, पानी उक के बेवस्था सुनिश्चित करेे गे हावय।

धान उपार्जन केन्द्र म शिकायत अउ निवारण बर हेल्प लाइन नंबर तको चस्पा कर दिये गे हावयं। विपणन संघ मुख्यालय स्तर म शिकायत निवारण बर कंट्रोल रूम के स्थापना तको करे गे हावय जेकर नं. 0771-2425463 हावय। धान पइसा के समय म भुगतान बर मार्कफेड डहर ले रकम के बेवस्था कर ले गे हावय। समिति मन म रकम आहरण बर ‘‘माइक्रो एटीएम’’ के बेवस्था तको दे जात हावय, जेकर ले के किसान मन ल सुविधा होही। किसान मन डहर ले समिति म धान बेचे के 72 घंटा के भीतर रकम किसान मन के बैंक खाताा म अंतरित कर दे जाही।