राज्य स्तरीय पंथी नृत्य प्रतियोगिता नवागढ़ म होही : खाद्य मंत्री बघेल

परम पूज्य गुरूघासी दास बाबा जी के जयंती के मउका अवइया महीना दिसंबर मेें तीन दिवसीय राज्य स्तरीय पंथी नृत्य प्रतियोगिता के आयोजन बेमेतरा जिला के नवागढ़ म होही। खाद्य मंत्री दयाल दास बघेल के अध्यक्षता म गुरू घासीदास जी के जयंती अउ राज्य स्तरीय पंथी नृत्य प्रतियोगिता ल आपसी परेम अउ सौहाद्रपूर्ण वातावरण म मनाये के फइसला लिस। जानबा होवय के पहिली तको राज्य स्तरीय पंथी नृत्य प्रतियोगिता के आयोजन नवागढ़ म करे जा चुके हावय, ए पंथी नृत्य ल देखे खातिर छत्तीसगढ़ ले ही नइ देश के आने-आने हिस्सा ले लोगन आथे।

श्री बघेल ह राज्य स्तरीय पंथी नृत्य प्रतियोगिता ल लेके आयोजित बइठक म किहिन के ये प्रतियोगिता तीन दिन तक आयोजित करे जाही। अभी ले प्रदेस के पंथी नृत्य के दल ल नेवता दे के बुता सुरू कर देना चाही। बइठक म प्रतियोगिता के स्वरूप, अउ आयोजन समिति, सुरक्षा समिति सहित आन बेवस्था ल लेके विस्तार पूर्वक गोठबात करे गिस। बघेल ह किहिन के कार्यक्रम म समाज के प्रतिष्ठित लोगन के संग-संग आन समाज के प्रतिष्ठित लोगन के सम्मान करे जाना चाही। ओमन अवइया महीना दिसंबर म होए वाला पंथी प्रतियोगिता ल बड़का स्वरूप म करे म सबके सहभागिता म जोर दीस।

बइठक म समाज के प्रमुखजन ज्ञानदास रात्रे, विजय बघेल, श्रीमती मंजुलता रात्रे, प्रकाश भारती, टी.आर जनार्दन, राकेश चतुर्वेदी, सुरेश बंजारे, अलेन दास, लोकनाथ पांडे, धनलाल धु्रव, कुमार मारकंडे, हेमलाल, गोकुल बंजारे, तरूण घृतलहरे सहित बड़े संख्या म समाज के लोगन मौजूद रिहिस।