रावतपुरा सरकार इंस्टीट्यूट ऑफ मेडिकल साइंसेज के नवा भवन के लोकार्पण मुख्यमंत्री विष्णु देव साय

मुख्यमंत्री विष्णु देव साय ह नवा रायपुर म रावतपुरा सरकार इंस्टीट्यूट ऑफ मेडिकल साइंसेस के नवा भवन के लोकार्पण करिन। ए मउका म स्वास्थ्य मंत्री श्याम बिहारी जायसवाल, वित्त मंत्री ओ. पी. चौधरी, विधायक इंद्र कुमार साहू, रविशंकर जी महाराज अउ मेडिकल कॉलेज के डीन डॉ. कुंदन ई. गेडाम मौजूद रिहिन।

मुख्यमंत्री ह ए मउका म मेडिकल कॉलेज के आने-आने विभाग अउ अत्याधुनिक क्लासरूम के अवलोकन करिन अउ इहां मौजूद सुविधा के जायजा लिस। ओमन एनाटॉमी म्यूजियम, डिसेक्शन हॉल, लैब, कम्युनिटी मेडिसीन डिपार्टमेंट सहित कई आन विभाग म अध्ययन-अध्यापन के कामकाज देखिस। मेडिकल कॉलेज के भ्रमण के बखत ओला जानकारी दीस के इहाँ अत्याधुनिक तकनीक अउ संसाधन मौजूद कराए गे हावयं, जेकर ले पढ़ईया ल गुणवत्तापूर्ण शिक्षा मिल सकही।

जानबा होवय के रावतपुरा सरकार इंस्टीट्यूट आफ मेडिकल साइंसेस एंड रिसर्च म मेडिकल के पढ़ाई के खातिर 150 सीट मौजूद हावय। ए साल ले ही मेडिकल कॉलेज के पहिली सत्र सुरू होइस हावय।

श्री रावतपुरा सरकार इंस्टिट्यूट ऑफ़ मेडिकल साइंसेस हॉस्पिटल म चिकित्सा के शुभारंभ

मुख्यमंत्री विष्णु देव साय ह रावतपुरा सरकार इंस्टीट्यूट ऑफ मेडिकल साइंसेस हॉस्पिटल म आने-आने चिकित्सा इकाइ सुरू करिन। मुख्यमंत्री ह 650 बिस्तरीय अस्पताल म मौजूद स्वास्थ्य सुविधा के जायजा लिस। ए बखत ओमन हॉस्पिटल म नवा सीटी स्कैन, एमआरआई यूनिट, डायलीसिस यूनिट अउ आपातकालीन चिकित्सा यूनिट ल सुरू करिन।

ओमन ए मउका म किहिन के नवा सुविधा के डहर ले मरीज मन ल सटीक अउ तुरते इलाज मिल सकही। ए मउका म मुख्यमंत्री ह हॉस्पिटल के कर्मचारी मन अउ डॉक्टर मन ले गोठबात करत उंकर बुता के बढ़ई करिस। ओमन किहिन के मेडिकल कॉलेज अउ हॉस्पिटल न सिरिफ क्षेत्रीय जरूरत ल पूरा करही, बल्कि आसपास के मरीज मन ल तको अत्याधुनिक स्वास्थ्य सेवा मौजूद कराही। एमआरआई अउ सीटी स्कैन जइसे अत्याधुनिक सुविधा मौजूद होए ले जटिल बीमारी के पता लगाये अउ इलाज करे म सहूलियत होही। इमरजेंसी यूनिट के सुरू आपातकालीन चिकित्सा सेवा ल तेज अउ प्रभावी बनाही। ओमन किहिन के मेडिकल कॉलेज क्षेत्र के युवा मन ल चिकित्सा शिक्षा के खातिर बढि़या मउका देही अउ लोगन ल स्वास्थ्य सेवा के फायदा मिलही।