रायपुर म टेनिस, राजनांदगांव म हॉकी अउ नारायणपुर म मलखंभ अकादमी होही शुरू

छत्तीसगढ़ म खिलाड़ी मन ल बढि़या प्रशिक्षण सुविधा दे के उद्देश्य ले राज्य सरकार ह तीन प्रमुख खेल अकादमी के स्थापना ल मंजूरी दे हावय। मुख्यमंत्री विष्णु देव साय के पहल म रायपुर म टेनिस अकादमी, राजनांदगांव म हॉकी अकादमी अउ नारायणपुर म मलखंभ अकादमी के स्थापना करे जाही। ये अकादमी के उद्देश्य आधुनिक खेल के संग-संग पारंपरिक भारतीय खेल ल तको बढ़ावा देना हावय।

राज्य म ये तीन नवा खेल अकादमी के स्थापना खेल ले परेम करइया अउ खिलाड़ी मन के खातिर ये एक बड़े उपलब्धि होही। टेनिस अउ हॉकी जइसे आधुनिक खेल के संग-संग, पारंपरिक भारतीय खेल मलखंभ ल पुनर्जीवित करे के दिशा म ये कदम जरूरी हावय। ये अकादमी म अंतर्राष्ट्रीय स्तर के अत्याधुनिक सुविधा अउ प्रशिक्षक के बेवस्था करे जाही, जेकर ले खिलाड़ी मन ल उच्च स्तरीय प्रशिक्षण मिलही। प्रशिक्षण के माध्यम ले अपन खेल कौशल ल निखारकर न सिरिफ राष्ट्रीय अउ अंतरराष्ट्रीय स्तर म छत्तीसगढ़ के प्रतिनिधित्व करही, उहें पारंपरिक भारतीय खेल ल नवा पहचान देवाये म तको सहायक होही।

जानबा होवय के वित्त मंत्री ओ.पी. चौधरी ह रायपुर के टेनिस अकादमी के खातिर 13 नवा पद, राजनांदगांव के हॉकी अकादमी के खातिर 14 नवा पद अउ नारायणपुर के मलखंभ अकादमी के खातिर 13 नवा पद के सिरजन ल मंजूरी दे हावय। ये अकादमी के स्थापना ले राज्य म खेल अधोसंरचना के तेजी ले विकास होही अउ खिलाड़ी मन ल उंकर सपना ल साकार करे म मदद मिलही। ये नवा खेल अकादमी के माध्यम ले छत्तीसगढ़ राज्य न सिरिफ राष्ट्रीय खेल मानचित्र म अपन पहचान मजबूत करही, बल्कि अंतरराष्ट्रीय स्तर म तको छत्तीसगढ़ के पहचान बनाये के तनि अग्रसर होही।