कोरबा जिला म कटघोरा ईलाका के अखरापाली धान खरीदी केंद्र म 60 लाख 53 हजार 680 रूपिया के अनियमितता परगट होए के बाद समिति प्रबंधक रामेश्वर प्रसाद अनंत अउ फड़ प्रभारी हितेंद्र कुमार के खिलाफ वसूली अउ आपराधिक प्रकरण दर्ज करे के कार्रवाई करे गे हावय। धान खरीदी म गड़बड़ी अउ धान के अफरा-तफरी के मामला म कार्रवाई कलेक्टर अजीत वसंत के निर्देश म करे गे हावय।
कलेक्टर अजीत वसंत के निर्देश के मुताबिक कटघोरा के अनुविभागीय अधिकारी (राजस्व) रोहित सिंह, तहसीलदार दीपका अमित केरकेट्टा, नायब तहसीलदार कटघोरा अउ राजस्व विभाग के टीम ह अखरापाली धान खरीदी केंद्र के भौतिक सत्यापन करिन। जांच म 1952.80 कोंटल धान कम पाये गिस, जेकर कीमत 60 लाख 53 हजार 680 रूपिया होथे। सत्यापन के बखत 30 ले 35 बोरा के तौल करे म धान के अकन मानक ले जादा मिलीस, जेकर ले अनियमितता के पुष्टि होइस। जांच टीम ह मउका म पंचनामा तइयार करके दस्तावेज जब्त कर लिस, अउ दोषी पाए गे अधिकारी मन उपर वसूली अउ आपराधिक कार्रवाई के प्रक्रिया सुरू कर दीस हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।