जउॅंहर होगे! पांचवीं बोर्ड परीक्षा म छत्तीसगढ़ी पाठ ले नइ आवय एको प्रश्न

छत्तीसगढ़ शिक्षा विभाग ह एसो कक्षा पांचवी अउ आठवी के परीक्षा ल फेर ले बोर्ड कर दे हावय। माने अब पहिली सहिक हरेक बच्छर पास होए के ढर्रा म थोरिक रोक लगिस। चलो ए तो बने बात होइस कि अब लइका मनके पढ़ाई के स्तर म थोरिक सुधार होही।

इही ओढ़र म स्कूल शिक्षा विभाग कोति ले मॉडल प्रश्न अउ ब्लू प्रिंट जारी करे गे हावय। उही मुताबिक स्कूल मन म लइका मनला परीक्षा के तइयारी कराये जावत हाबे। ये बीच पांचवी कक्षा के हिन्दी विषय के ब्लू प्रिंट ल देखके करेजा मुंह म आगिस।

अरे जउॅंहर होगे! पांचवीं बोर्ड के परीक्षा म छत्तीसगढ़ी पाठ ले एको प्रश्न नइ पूछे हावय। जारी करे गे ब्लू प्रिंट म ये साफ दिखत हाबे के एको ठी छत्तीसगढ़ी पाठ ले बोर्ड म प्रश्न नइ हावय। पांचवी के बोर्ड परीक्षा म हिन्दी विषय म शामिल छत्तीसगढ़ी के पाठ मान ले सवाल नइ पूछना ल का समझे जाए? का ये राजभाषा छत्तीसगढ़ी के अपमान नोहय।

गुनान गोठ-

1. का छत्तीसगढ़ी के पाठ ल स्कूल म नइ पढ़ाये गे हावय?

2. का लइका मन छत्तीसगढ़ी म उत्तर नइ लिख पाही?

3. कहू छत्तीसगढ़िया मनके लइका उगुवा जही अइसे डर हे का?

4. का ये गैर छत्तीसगढ़िया मनला आगू बढ़ाये के साजिश नोहय?

5. का गुरूजी मन छत्तीसगढ़ी पाठ के ले प्रश्न-उत्तर कराये नी जानिस?

6. कहू परदेसिया मनके दबाव तो नइ हे?

7. जब प्रश्न पूछना नइ रिहिस तव छत्तीसगढ़ी के पाठ ल राखे काबर हव?

8. छत्तीसगढ़ी ह एम.ए कक्षा तक पहुंचगे हावय त पांचवी म प्रश्न ल काबर हटाये जावथे?

9. जब सीजीपीएससी अउ व्यापम परीक्षा तक म छत्तीसगढ़ी के सवाल पूछे जावथे त पांचवीं बोर्ड म का अड़चन हे?

10. छत्तीसगढ़ी के पाठ मनला ही काबर चुन चुनके हटाये जावथे?