कुदरगढ़ महोत्सव के तइयारी ल लेके बइठक के करे गिस आयोजन

कुदरगढ़ महोत्सव

चैत्र नवरात्र म आयोजित होवइया कुदरगढ़ महोत्सव के तइयारी सुनियोजित तरीका ले हो, येकर खातिर कलेक्टर एस.जयवर्धन के अध्यक्षता म सूरजपुर कलेक्ट्रेट सभाकक्ष म बइठक के आयोजन करे गे रिहिस। जेमा कुदरगढ़ महोत्सव आयोजन के संबंध म जरूरी बिंदु म गोठबात करे गिस। बइठक म कार्यक्रम जगह म साफ सफाई, बिजली व्यवस्था, पानी बेवस्था अउ पार्किंग बेवस्था के बढि़या इंतजाम ल लेके संबंधित मन ल जरूरी दिशा निर्देश दिये गिस। कलेक्टर डहर ले कुदरगढ़ मंदिर के आस पास के परिक्षेत्र के दुकानदार के संग एसडीएम अउ जनपद सीईओ ल बइठक ले के निर्देश दिये गिस। जेमा सिंगल यूज प्लास्टिक म प्रतिबंध लगाये अउ बढि़या सफाई प्रबंधन बर सबो ल डस्टबिन रखे बर प्रेरित करे के बात कहिन।

चइत नवरात्र के बखत म मां बागेश्वरी के दरसन के खातिर आने वाला दरस करइया ल बढि़या ले बढि़या सुविधा मौजूद हो, कलेक्टर ह ए बात म बिसेस धियान दे के बात कहिन। बइठक म डीएफओ पंकज कमल, जिला पंचायत सीईओ श्रीमती कमलेश नंदिनी साहू, एसडीएम सागर सिंह, संभाग प्रभारी अधिकारी पर्यटन आशीष वर्मा, ओड़गी जनपद सीईओ नृपेंद्र सिंह अउ आन संबंधित अधिकारी मौजूद रिहिस।