दंतेवाड़ा के परसिध फागुन मड़ई

Dantewada famous Phagun Madai 10 दिवसीय फागुन मड़ई मेला कलश स्थापना के संग शुरू 

अंजोर छत्‍तीसगढ़ी समाचार। श्री दंतेश्वरी माई जी दंतेवाड़ा के परसिध फागुन मड़ई (मेला) कलश स्थापना के संग  05 मार्च 2025 ले सुरू होगे हावय। दंतेश्वरी मंदिर के जिया ह बिहनिया 11 बजे परम्परानुसार मेंडका डोबरा मैदान म गुड़ी म माई जी छत्तर के परान प्रतिष्ठा करके कलश के स्थापना करिस। येकर संग ही जिया ह बताइन के संझा 4 बजे नारायण मंदिर के खातिर माई जी मंदिर ले डोली निकलही संग ही ताड़पलंगा धोनी के रस्म रतिहा 9 बजे विधि विधान ले संपन्न करे जाही। 05 मार्च ले पहिली दिन कलश स्थापना के संग दस दिवसीय मेला के सुरू हो गे हावय। नेवताए देवी-देवता मन ल तको सम्मान के संग आसन ग्रहण कराये जाही। फागुन मेला 05 मार्च ले 15 मार्च तक सरलग आने-आने कार्यक्रम पूजा-पाठ के संग सम्पन्न होही। परम्परागत वाद्य यंत्र के गूंज मंत्रोपचार के संग ही सेवक पुजारी अउ मांझी चालकी ए मउका म मौजूद रिहिस।