- मुख्यमंत्री विष्णु देव साय गिरौदपुरी मेला म होइस शामिल
- गुरु गद्दी के पूजा करके लिस आशीर्वाद, प्रदेसवासी के ख़ुशहाली अउ समृद्धि के कामना करिस
- गिरौदपुरी मेला के रकम 25 लाख ले बढ़ाके 50 लाख अउ मेला परिसर के मुख्य प्रवेश दुवार ले मुख्य मंदिर तक स्थाई शेड बनाये के घोसना
- Guru Darshan Mela will be held from 4th to 6th March at Giroudpuri Dham
अंजोर छत्तीसगढ़ी समाचार। मुख्यमंत्री विष्णु देव साय ह गिरौदपुरी धाम म आयोजित गुरुदर्शन मेला के पहिली दिन गुरु गद्दी के दरसन अउ पूजा-अर्चना करके प्रदेसवासी के खुसयाली अउ समृद्धि के कामना करिस। मुख्यमंत्री साय ह ए मउका म मेला समिति के मांग म गिरौदपुरी मेला के रकम 25 लाख ले बढ़ाके 50 लाख अउ दरस करइया के सुविधा बर मेला परिसर के मुख्य प्रवेश दुवार ले मंदिर तक स्थायी शेड बनाये के घोसना करिस।
मुख्यमंत्री विष्णु देव साय ह मंदिर म दरसन के बाद दरस करइया ल स्वयं प्रसाद बांटिस। ए मउका म धर्मगुरु गुरुबालदास साहेब, पूूूर्व विधानसभा अध्यक्ष गौरी शंकर अग्रवाल, कैबिनेट मंत्री दयाल दास बघेल, पुलिस महानिरीक्षक अमरेश मिश्रा, कलेक्टर दीपक सोनी, एसएसपी विजय अग्रवाल सहित बड़का संख्या म संत अउ दरस करइयागण मौजूद रिहिस।
जानबा होवय के तीन दिवसीय गिरौदपुरी मेला 4 मार्च ले 6 मार्च तक आयोजित होही। गिरौदपुरी धाम म हर साल आयोजित होए वाला ये मेला गुरु घासीदास जी के सत्य, अहिंसा अउ समानता के संदेश ल जन-जन तक पहुँचाये के माध्यम बनत हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।